يا مصر اسمك موال يغنوه الشعرا والزجال
يغنيه الكهول والعيال
تغنيه الصبيه والست اللى بالبيت ساكنه من مية عام
تغنيه السمرا والشقرا
يغنيه النسوة والرجال
يغنيه اللى بارضك ساكن وصابر على مر الدهر
يغنيه اللى جمع من ارضك المال
يغنيه اللى اتغرب بعيد عن ارضك غصب عنه عشان لقمه وهدمه للعيال
يغنى ويصبر نفسه باليوم اللى يبوس ارضك ويقولك رجعتلك يا امى يا ارض الرجال
مهما نتغرب بعيد عنك ويقسى علينا حكامك
لا يوم ها نزعل منك ولا نكرهك
لانك امنا
لانك دمنا ولحمنا وعروقنا
يا مصر مهما من الفقر والذل دقنا
لسه بنحبك
بنحبك اد الميه اللى جرت بنيلك طول الدهر
بنحبك مش يوم ولا سنه ولا شهر
بنحبك من يوم ما نشق ارضك ونطلع لشمسك
بنحبك لما بيقوى عودنا
ويخضر العود ويفضل للسما ممدود
وتكبر اوراقه
ويطلع منه الزهر والحبه
ويكبر حبك بكل سنبلة وبكل ورده
ويحصدونا وننطحن جوا طواحينك
ولسه بنحبك
ويعجنونا ويخبزونا فى نار مخبازهم
ولسه بنحبك
و يتخنقوا علينا فى طوابيرك
ياه ولسه بنحبك
وياكلونا
ولسانا يا مصر بنحبك
ويوم ما نرجع لطينك
بيكون يوم الراحه لينا
وندفن بارضك
ولسه بنحبك
وهايعيش المصرى ويضحى بعمره عشان ارضه
ولسه بنحبك
يا موال واغنيه
يا احلى ارض بعنيه
هافضل اغنيلك يا مصر بنحبك
كل يوم بيزيد حبك بقلبى وتحلى صورتك بعينيه
مع تحيات\ هادى الانصارى
الجمعة مايو 28, 2010 2:35 pm من طرف حسن البنا