وا إسلاماه
المدير الإدارى للمنتدى
عدد المساهمات : 886
تاريخ التسجيل : 02/10/2009
نقاط : 7465
 |  موضوع: عاوز تتكلم انجليزى زى الاجانب؟...هنا الحل الإثنين أكتوبر 14, 2013 7:40 pm | |
|
السلام عليكم... اللي عاوز يستفيد يقرا الموضوع للاخر بنسأل نفسنا دايما .. مع اننا درسنا الانجلش في المدارس واتهرينا كورسات .. نجيب كتب ونقعد نحفظ في كلمات.. وفي الاخر لما نيجي نتفرج على فيلم امريكي بنلاقي نفسنا مش فاهمين حاجة ! .. وكل واحد بيقول في نفسه .. انجليزي ده يا مرسي ؟؟؟؟ !!!!
والحل !! .. هو يعني يا اما نعيش في امريكا او بريطانيا او بلد اوروبي عشان نتكلم انجليزي كويس يا اما ندرس في مدارس اجنبي وجامعات امريكية .. يا اما خلاص عمرنا ما هنتقن اللغة ؟؟؟
الجواب : لا .. جبتلكم طرق حديثة لتعليم اللغة الانجليزية بالشكل اللي يخليك تتكلم انجليزي زي الامريكان او الانجليز .. النتائج بتاعت الطريقة دي :
1- هتتكلم انجليزي اسرع .. وبدون ما تفكر في الجملة قبل ما تقولها . 2- لما تتفرج على فيلم اجنبي مش هتحس انهم ( بياكلوا نص الكلمة ) .. وحتى لو كلوها كلها .. برضو هتفهم .
3- النطق .. هيبقى زي الامريكان بالزبط !
4- هتتكلم اللغة براحة وطلاقة .. ولما تتكلم مع اجانب .. مش هتكون محتاج انك تركز اوي عشان تفهم هو بيقول ايه !
وعشان تحقق النتائج الهايلة دي لازم تغير طريقتك اللي بتدرس بيها الانجليزي .. وتتبع الطريقة اللي هقولك عليها :
1- ما تقعدش تحفظ في كلمات انجليزي !ما تستغربش .. أيوة ما تضيعش وقتك بحفظ لستة كلمات وفي الاخر مش هيثبت في دماغك منهم الا كلمتين تلاتة .
والبديل ؟؟؟ احفظ عبارات انجليزي .. لأن العبارة او الفقرة بتتكون من مجموعة من الكلمات المترابطة مع بعضها بشكل انسيابي , لما تصادفك كلمات جديدة .. ترجمها واعرف معناها .. لما تيجي تراجعها راجع الفقرة كلها اللي وردت فيها الكلمات دي .. مش تراجع الكلمة وتسيب العبارة .. كده غلط !
الطريقة دي بتخليك تتعلم الانجليزي بشكل اسرع من 4-5 مرات من طريقة دراسة المفردات لوحدها ..
2- ما تدرسش قواعد انجليزي ( Grammar) !اركن كتب الجرامر اللي عندك على جمب .. الجرامر هيعلمك تفكر اوي في الجملة قبل ما تقولها .. بس انت مش عايز كده .. انت عايز تتكلم بسرعة .. زي الاجانب !
لو عايز تدرس جرامر انت حر .. بس هتكون بتضيع وقت .
3- اسمع وجاوب , ما تسمعش وتكرر اللي سمعته, ازاي ؟؟
اسمع قصة انجليزية قصيرة وعليها اسئلة بسيطة وسهلة وجاوب على الاسئلة .. كرر سماعها لحد ما تقدر تجاوب على كل الاسئلة بتاعتها .. كل مرة هتسمع فيها السؤال هتلاقي نفسك بتجاوب عليه بتلقائية .. بدون تفكير , يعني هتكتسب مهارة انك تجاوب على الاسئلة الموجهة ليك بالانجليزي ( اتوماتك ) .. زي الاجانب !
4- ادرس الاصطلاحات التعبيرية الشائعة باللغة الانجليزية ,يعني ايه ؟؟
الاصطلاح التعبيري هو عبارة عن كلمتين او اكتر بيحملوا معنى كلمة وحدة .. ودي مش هتلاقيها في القاموس !
مثلا مصطلح : high and dry , واحد ما بيعرفش مصطلحات هيترجمها لـ : عالي وجاف ... و طبعا غلط !
الكلمتين دول مع بعضهم معناهم : سالم غانم .
يعني فلان رجع من السفر سالم غانم ! أيوة هو ده المعنى عند الاجانب .. وده اللي بنسميه تعبير اصطلاحي .
مثال تاني : كلمة يُنهي .. طبعا معروفة يعني end أو finish , بس مرات الاجانب ما بيعبروش عنها بكلمة end ! بيعبروا عنها بكلمتين : break up .. يعني : end = break up , وأكيييد عندنا مئات التعبيرات الاصطلاحية .. بس احنا بنقولك احفظ منها الاكثر شيوعاً عند الاجانب , لان الاجانب بيستخدموها طول الوقت , عشان تفهمهم لما يتكلموا بسرعة .. لازم تفهم التعبيرات الاصطلاحية الشائعة بشكل كويس .
طب ازاي اتعلم التعبيرات الاصطلاحية دي ؟؟ ومنين ..!
أ - ملفات كتيرة مخصوص للتعبيرات دي موجودة في الانترنت ممكن تحملها من اي موقع , أو انك تشتري قاموس للاصطلاحات الامريكية .
ب - اسمع اللغة من اصحابها الاصليين ( افلام , برامج , محادثات مخصوصة لتعليم الانجليزي زي الاجانب .. الخ ).
5- التركيز على مهارة الاستماع:مهارة الاستماع هي اكتر طريقة فعالة للي عايزين يتكلموا انجليزي بطلاقة ..
انك تقرأ انجليزي من كتاب وتحاول تكتب دي حاجة كويسة .. بس عشان تتكلم زي الاجانب لازم تركز اكتر على الاستماع للاجانب !
طب اسمع ايه ؟؟ قبل ما اقولك تسمع ايه لازم اقولك ايه اللي المفروض ما تسمعوش !
ما تجيبش كتب انجلش ومعاها سي ديز للنطق ! ده غلط .. ليه ؟؟ لان الانجليزي اللي بتسمعه من السي ديز دول انجليزي بيتقال بشكل رسمي .. وبيحاول دايما ينطق الكلمة بكل وضوح لانه الهدف تعليمي .. ده غير ان مفيش عاطفة في التعبير .. ومش ده اللي احنا عايزينه .. احنا عايزين نتكلم زي الاجانب بتلقائيتهم وعفويتهم
عايزين نفهم الافلام بدون ترجمة !
المشكلة التانية الموجودة في السي ديز دي انها بتديك الكلمات منفردة .. بس الاجانب عندهم كلام كتير بيخلطوه في بعضه بشكل سريع اللي مش متعود عليهم ما بيفهموش .. زي : outta واللي هي عبارة عن out of وكمان زي : I'm gettn outta here ...يعني : I am getting out of here يعني انا عايز امشي أو I am leaving ..
طب اسمع لايه ؟؟ اسمع للافلام .. للبرامج الاجنبية .. المحادثات الاجنبية الطبيعية
هقولك على طريقة كويسة :اشتري فيلم اجنبي .. وركز على مشهد معين لمدة اسبوع .. حاول تستخرج الكلمة اللي ما بتعرفهاش وتكتبها على جمب .. الترجمة العربي الموجودة هتساعدك , عيد المشهد كزا مرة بتركيز ,, وكل ما تعيد اكتر حاول ما تبصش للترجمة العربي ,, تعالى بعد كزا ساعة .. عيد نفس المشهد .. بالليل قبل ما تنام عيد نفس المشهد .. كرر المشهد في اوقات متفرقة على مدار اليوم .. وافضل على الحالة دي لمدة اسبوع النتيجة : هتلاقي نفسك حافظ المشهد بنفس الطريقة الطبيعية اللي اتقال بيها في الفيلم ! وحافظ الكلمات اللي فيه .. وحافظ التعبير الاصطلاحي الموجود .. الاسبوع اللي بعده .. المشهد اللي بعده .. وما تقولش صعب مش فاهم حاجة وتقفل ..لا .. التكرار يعلم الشطار ! والزن عالودان اقوى من السحر .. كتر الاعادة هتحفظك المشهد حتى لو مش فاهمه لحد ما يخلص الفيلم بالطريقة دي .. هتكون حافظ 90% من محادثات الفيلم بشكلها الامريكي الطبيعي .. وبنفس النغمة الطبيعية اللي بتخرج من الممثلين !!! تخيل بعد كزا فيلم ايه النتيجة؟؟؟ !! الانجليزي بتاعك هيكون انجليزي امريكي وكأنك كنت عايش هناك !! 
باختصار : ( عايز تتكلم انجليزي كويس اوي ؟ اسمع انجليزي كويس اوي اوي اوي )
6- معلومة : عشان تتكلم انجليزي كويس جدا انت مش محتاج تحفظ عشرات الالاف من الكلمات والقواعد الانجليزية ! كل اللي محتاجه انك تحفظ وتتعرف على الكلمات والقواعد اللي بيستخدموها الاجانب يوميا .. واللي لازم تعرفه ان القواعد والكلمات اللي بيستخدموها بشكل يومي عبارة عن 20% من كلمات وقواعد اللغة الانجليزية بس ! معقولة !
ايوة .. الاجانب المتعلمين ودارسين انجليزي كويس جدا بيعرفوا اكتر من 50.000 كلمة انجليزي واغلبها بيستخدم في المناهج التعليمية بتاعتهم .. بينما نفس الاشخاص دول .. بيستخدموا 3000 كلمة من الـ 50.000 كلمة في محادثاتهم اليومية العادية .. وده اللي احنا عايزينه !
عشان كده لما نشوف كتاب جرامر كبير .. وكميات عجيبة من المفردات .. مش لازم يجينا احباط ونقول هو انا هحفظ كل ده ؟؟!! .. اكيد لا ! .. انت احفظ اكتر 3000 كلمة شائعة .. واكتر 100 مصطلح تعبيري شائع .. اسمعهم وادرسهم كويس اوي .. هتلاقي الانجليزي بتاعك بقى هايل .. ولو عايز تتعلم اكتر الموضوع بالنسبالك هيبقى اسهل...
أتمنى تكونواآ استفدتم...
و متنسووووش الردوود...
منقوووووووووووول
| |
|
